香港有普選?政府一定話:「有」!但呢個普選就一定唔符合民主派所願架喇。
喺政府嘅宣傳片已經話咗俾所有香港人知,我地有「普選」!!!起初就話有商有量,到之後話有根有據,到而家恐嚇咁話:「有票,唔通唔要?」
成個流程就好似電影入面D綁匪挾持人質,D差佬入去救人要「有商有量」咁入去同綁匪談判,當綁匪同差佬傾唔埋,綁匪就「有根有據」咁話我有人質喺手。仲凶番個差佬話「有命,唔通唔救?」
而家個政府,擺到明咁講:「我而家就俾你一人一票選,我俾咗就算,一錘定音。夠薑你大不了可以唔投唔選,吹咩!」
面對呢個土豪一般嘅政府,只有兩條路可以走:
1)乖乖地投入土豪嘅懷抱,喺呢個框框入面玩,接受呢個框框就唔洗嘈
2)剷除土豪,打破呢個不知所謂嘅框框,去掉幻想,預備抗爭
建制派就已經向第一條路行緊,作為在野嘅民主派,竟然唔係行第二條路,係無喇喇自己鑿第三條路出嚟,而呢條路,注定係掘頭路。
泛民主派重蹈2010年入中聯辦之覆轍,齊齊出賣香港人。面對呢個土豪,泛民主派選擇搖尾乞憐求土豪放過自己,好似冇錢還嘅債仔面對收數佬一樣。所謂第三條路,就係要喺框框入面加D框框出面嘅野,又唔去打破框框,又唔同意呢個框框,嘅自以為中立嘅人。
而家走第二條路最弱勢,但係係拯救香港嘅唯一希望。走第一條路嘅人又話第二條路嘅人係反中央嘅反動分子,第三條路(?)嘅人又話第二條路嘅人係分化泛民主派、撕裂社會嘅元兇。
筆者覺得走第一條路嘅人已經冇得救,佢地係土豪D o靚,所以插佢地都冇用。
而最應該插就係走第三條路嘅人,呢D人就係泛民主派同「自詡」進步民主派
泛民主派:搞個佔中搞到一塌糊塗已經不在話下,成日用團結為名陷港人於不義。土豪一般嘅政府用「基本法」呢個框框呢鎖死咗普選嘅格式,已定勝「公民提名」等等泛民主派訴求為框框外的雜質,面對如斯局面,泛民主派選擇名節保身,既不接受、又不勇於反抗。更懦弱而愚蠢得去談判。試幻想吓,一個冇錢還嘅債仔面對收數佬時,你同佢講道理?下場咪俾人淋紅油囉。如果談判係得呀,你班泛民主派就唔會爭取民主三十年都仲運緊桔啦!
「自詡」進步民主派:自從黃毓民退出人力,自成本土派。以人力社民連為主嘅「自詡」進步民主派,漸漸痴埋去泛民度,昔日「進步」不再,人力更成為「反黃毓民基地」除左反黃毓民,毫無建樹。又話乜野監察佔中,有鬼用咩,又咪一塌糊塗。守護海怡?又咪為咗選票。而家就連掟野都淆。呢D同泛民主派接近同流嘅人,繼續同泛民主派一樣。獨佔進步民主派之光環。繼續做「自詡」進步民主派啦吓。
「來簡約地等多八十年,態度未曾改變」
政府、建制、泛民、「自詡」進步民主派,繼續如此態度。普選?等多八十年都唔知有冇
0 意見 :
發佈留言